OUTONO...

     O outono é unha estación do ano que ofrece múltiples posibilidades educativas para achegarse ao coñecemento do medio natural a través da observación, a exploración e a experimentación sensorial.

    Durante esta época prodúcense cambios na contorna que os pequenos poden percibir directamente: a caída das follas, os cambios nas cores das árbores, a chegada do frío, a choiva ou a aparición de froitos propios desta estación.

    A través de propostas lúdicas, manipulativas e adaptadas, preténdese favorecer a curiosidade, o descubrimento e a aprendizaxe activa.As actividades permiten estimular os sentidos, desenvolver a motricidade fina e grosa, enriquecer a linguaxe, fomentar a expresión artística e favorecer as relacións sociais. 

ANIVERSARIOS MES DE SETEMBRO...

 Parabéns para Gorka no seu aniversario.

AS UVAS....

 Non hai vendima sen uvas...

    A realización dun mural sobre as uvas achéganos a chegada do outono e a vendima. A través da observación, manipulación e experimentación con diferentes materiais, favorécese a exploración sensorial e a expresión artística.

    Ademais, permite traballar de maneira globalizada aspectos relacionados coas cores, as formas, as texturas, o vocabulario e a coordinación óculo-manual.

A VENDIMA....

     A vendima constitúe unha tradición profundamente vinculada á cultura e á identidade de Galicia, especialmente ao medio rural. Achegar esta realidade aos nenos e nenas permite favorecer o coñecemento do contorno próximo a través dunha experiencia significativa, sensorial e lúdica.

    A proposta parte da curiosidade natural dos pequenos e pequenas e do seu interese por tocar, observar, cheirar, probar e experimentar. A través da uva e das diferentes actividades relacionadas coa vendima, poderán descubrir características dos alimentos, experimentar con diferentes texturas e cores e participar en pequenas accións de manipulación.

    Ademais, a actividade permite achegar ás crianzas ás tradicións e costumes da súa contorna.